Татбиқи 9 лоиҳаи инвеститсионӣ дар бахши обтаъминкунӣ

Душанбе, 28.03.2014.(АМИТ «Ховар», Марзия Саидзода).-Алҳол дар Ҷумҳурии Тоҷикистон дар бахши обтаъминкунӣ дар ҳамкорӣ бо дигар созмонҳои байналмилалии молиявӣ 9 лоиҳаи муштараки инвеститсионӣ амалӣ мегардад. Ин матлабро дар назди вакилони палатаи поёнии Парлумони мамлакат Ҷамолиддин Нуралиев- муовини аввали вазири молияи ҷумҳурӣ зикр намуд. Мавсуф гуфт, ки маблағи умумии лоиҳаҳои бахши обтаъминкунӣ 620 миллион сомониро ташкил дода, аз он 422 миллион сомонӣ грант, 176 миллион сомонӣ қарз буда, саҳми Ҳукумати Ҷумҳурии Тоҷикистон 21 миллион сомонӣ мебошад. Бояд тазаккур дод, ки бо оби тозаи ошомиданӣ таъмин намудани аҳолии кишвар яке аз ҳадафҳои стратегии Ҳукумати Ҷумҳурии Тоҷикистон маҳсуб меёбад, ки он дар стратегияи баландбардории некуаҳволии мардуми ҷумҳурӣ зикр шудааст. Дар ин раванд Ҳукумати Ҷумҳурии Тоҷикистон баҳри бартараф намудани мушкилоти ҷойдошта ва таъмини пурраи аҳолии кишвар бо оби тозаи нӯшокӣ кӯшишҳои зиёд ба харҷ дода истодааст. Ба тасвиб расилани Созишномаи грантӣ байни Ҷумҳурии Тоҷикистон, Корхонаи воҳиди давлатии «Хоҷагиии манзилию коммуналӣ» ва Бонки аврупоии таҷдид ва рушд оид ба Лоиҳаи «Беҳтар намудани системаҳои обтаъминкунии шаҳрҳои марказии Тоҷикистон» яке аз талошҳои ҳукумати ҷумҳурӣ мебошад, ки чанде пеш аз ҷониби вакилони Маҷлиси намояндагон ба тасвиб расид.