Туҳфаи наврӯзӣ ба хонандагони Коллеҷи тиббӣ

Хуҷанд, 20.03.2014.( АМИТ «Ховар», Абдуаҳад Шарифзода).-Дар арафаи ҷашни Наврӯз донишҷӯёни Коллеҷи тиббии шаҳри Хуҷанд туҳфаи идона гирифтанд. Дар коллеҷи мазкур се синфхонаи нав ба истифода дода шуд.
Тавре ки ба мо аз маркази иттилоотии шаҳрдори Хуҷанд хабар доданд, синфхонаҳои нав  бо компютер ва дигар  воситаҳои муосири технологӣ, аз қабили тахтаи электронӣ ва проэктор муҷаҳҳаз буда, маблағи умумии он 200 ҳазор сомониро дар бар мегирад. 
Дар маросими ифтитоҳи синфхонаҳо ба истиқболи ҷашни Наврӯз дар саҳни ҳавлии ин муассисаи таълимӣ донишҷӯён бо оростани хони идона таомҳои наврӯзиро ба намоиш гузоштанд.
Инчунин дар ин рӯз маросими хатнатӯи панҷ нафар кӯдак аз оилаҳои ниёзманд баргузор гардид, ки дар он раиси шаҳри Хуҷанд Р.Аҳмадзода, иштирок намуда, ба соҳибҷашнҳо туҳфаҳои идона тақдим намуд.