Вусъати ниҳолшинонӣ дар ноҳияи Турсунзода
Душанбе,10.03.2014. (АМИТ «Ховар», Назир Назиров).- Исломиддин Солиев, сардори шуъбаи ҳифзи муҳити зисти шаҳри Турсунзода дар бораи ҷараёни маъракаи ниҳолшинонӣ дар ноҳия гуфт, ки бунёд ва барқароркунии боғҳо, токзор, ҷангалзор ва шинондани қаламча дар мавсими баҳори соли 2014, то ҳоло 33 ҳазору 907 ниҳол шинонида шудааст, аз ҷумла, 6661 ниҳоли мевадиҳанда, 27 246 ниҳоли ороишию сояафкан, 148 ҳазору 587 дона қаламча тайёр гардидааст.
Ҳар рӯзи шанбе тамоми сокинони шаҳр дар маъракаи кабудизоркунӣ фаъолона ширкат меварзанд.
Тибқи нақшаи кории шуъбаи ҳифзи муҳити зисти шаҳри Турсунзода дар мувофиқа бо мақомоти иҷроияи ҳокимияти давлатии шаҳр ҷиҳати ошноӣ бо вазъи воқеии ҳолати муҳити зист, тозагӣ, буриши ғайриқонунии дарахтон, ифлосшавии ҷўю каналҳо ва дигар манбаъҳои обӣ, ҳолати замин дар ҳудуди шаҳр, ҷамоатҳои деҳот, корхонаву ташкилотҳо, муассисаву идораҳо ва хоҷагиҳо амалиёти фаврии «Экология» ҷараён дорад.