Заҳролудшавии 40 нафар дар Ашт

Хуҷанд, 27.03.2014. (АМИТ «Ховар», Абдуаҳад  Шарифзода).-Дар охири ҳафтаи гузашта дар шимоли кишвар чанд нафар сокини ноҳияи Ашт пас аз истеъмоли консерваи хонагӣ заҳролуд шудааст. Тавре ки аз Маркази санитарию эпидемиологии вилояти Суғд иттилоъ доданд, ин ҳодиса дар деҳаи Қаҳрамони ҷамоати Шодобаи ноҳияи мазкур ба вуқӯъ омадааст.  
Ба гуфтаи манбаъ, рӯзи якшанбе, 23-юми март ҳангоми таҷлили ҷашни Наврӯз дар манзили яке аз сокинони деҳаи Қаҳрамон наздики 40 нафар аз истеъмоли консерваи дастисохти помидору бодиринг заҳролуд шудааст. Сари вақт ба бемористон бурдани онҳо боиси пешгирӣ аз марги онҳо шудааст. Дар айни  ҳол 4 нафар чун бемори ботулизм, 3 кӯдак ва як зан дар шӯъбаи эҳёи беморхонаи марказии ноҳияи Ашт таҳти назорати табибон қарор доранд. Инчунин 3 тан дар ҳолати миёна ва 26 нафари дигар дар ҳолати сабук дар бемористон бистарӣ шудааст. 
   Вобаста ба ин рӯзи чаҳоршанбе, 26-уми март як гурӯҳи табибон аз Вазорати тандурустӣ ба аёдати беморон рафтанд. Дар айни ҳол ба ҳамаи беморон ваксинаи зидди ботулизм гузаронида шудааст ва вазъи саломатии ҳамаи онҳо зери назорати духтурон қарор дорад.