Ҳаҷми қарзҳои хурд 31 фоиз зиёд гардид

 Душанбе, 23.04.2014. (АМИТ «Ховар», Лайло Тоирӣ).- Омӯзиши нишондиҳандаҳои оморӣ нишон дод, ки бақияи умумии қарзҳо дар қаламрави ҷумҳурӣ дар семоҳаи аввали соли равон ба таври назаррас афзоиш ёфта, нисбат ба ҳамин давраи соли гузашта 39,8 фоиз зиёд шуда, 8 млрд 037,3 млн. сомониро ташкил намудааст. Аз ҷумла, 3’ 264,2 млн. сомониро қарзҳо бо пули миллӣ ва 4’ 773,1 млн. сомониро қарзҳо бо асъори хориҷӣ ташкил доданд. 
      Бино ба маълумоти хадамоти матбуоти Бонки миллии Тоҷикистон, дар давраи ҳисоботӣ фоизҳои миёнавазни қарзҳо бо пули миллӣ ба 27,06 фоиз ва бо асъори хориҷӣ ба 23,11 фоизи солона баробар шуданд. 
     Ҳамчунин дар моҳҳои январ-марти соли равон бо назардошти баланд будани талабот, ҳаҷми қарзҳои хурди додашуда афзуда, нисбат ба ҳамин давраи соли қаблӣ 31 фоиз зиёд гардидааст. Аз ин маблағ 263,8 млн. сомонӣ ба ноҳияҳои дурдасти кӯҳистон қарзҳои хурд дода шудаанд, ки дар муқоиса ба ҳамин давраи соли гузашта 28,6 фоиз зиёд мебошад.