Ҳамкории «Помирэнерҷӣ» бо «Ҳидро Ду»
Хоруғ, 21.04.2014. (АМИТ «Ховар», Файз Мирасан).- Бо ибтикори мутахассисони ширкати «Помирэнерҷи» ва ҳамтоёнашон аз кишвари Чин неругоҳи хурди барқии ноҳияи Ишкошим таъмиру таҷдид гардида, ба низоми ягонаи барқтаъминкунии вилоят пайваст шуд.
Ин усул ба хотири он роҳандозӣ мешавад, ки аксарияти неругоҳҳои хурди барқӣ дар навоҳии вилоят ба иллати куҳна шудани таҷҳизоти техникӣ иқтидори барқтавлидкунии худро аз даст додаанд. Барои таъмири пайвастаи неругоҳҳо маблағи зиёд масраф гардида, фоидаашон сол аз сол коҳиш меёбад. Аммо баъди васли ҳисобкунакҳои электронӣ, таҷдиди интиқоли хатти барқ, ҷорӣ намудани низоми автоматикии назорат ва баҳисобгирии барқ ба ширкати мазкур имкон дод, ки ҳангоми интиқоли барқ ба навоҳии дурафтода талафоти техникӣ ва тиҷоратиро ба маротиб кам гардонад. Пайваст кардани неругоҳи Намадгут ба низоми ягонаи барқии вилоят таҷрибаи нахустини ширкати мазкур аст ва он идома хоҳад ёфт.
Таҷҳизотро барои анҷом додани чунин кори мураккаб ширкати «Хидро Ду», мутааллиқ ба Ҷумҳурии Мардумии Чин дастрас намуд. Мутахассисони ширкати «Помирэнерҷӣ» ва муҳандисон аз кишвари Чин дар давоми се ҳафта таҷҳизотро комилан васл намуданд. Имтиҳони тестӣ, ки аз 72 соат иборат буд, бо муваффақият паси сар шуд. Реҷаи коҳиш ва афзоиши шиддат нишон дод, ки дастгоҳҳои неругоҳ устувор ва муътадил фаъолият мекунанд.