Ҳамоиш ба ифтихори 90-солагии Душанбе

Душанбе, 11.04.2014. (АМИТ «Ховар», Раъно Нусратуллозода). Дар Донишкадаи молия ва иқтисоди Тоҷикистон  бахшида ба 90-солагии шаҳри Душанбе мизи мудаввар доир гардид. Дар он роҳбарон ва устодону кормандони корхонаву муассисаҳои олии таълимӣ,  воқеъ дар ноҳияи Сино, собиқадорони ҶБВ ноҳия ширкат варзиданд. 
Дар ҳамоиш ректори Донишкадаи молия ва иқтисоди Тоҷикистон  Ашӯрбой Солиев иброз дошт, ки шаҳри Душанбе маркази гирдоварандаи истеъдодҳову мутафаккирон ва шаҳри мутамарказонидаи ғояи миллӣ, маркази фарҳанги тоҷикон аст. Пойтахти мо чун макони ҷараёнгирии рушди давлатдории тоҷикон ва ифодагари пешрафти ҷумҳурии азизамон гардидааст.
Иштирокдорони ҳамоиш перомуни пойтахти кишвар сухан гуфта, иброз намуданд, ки имрӯз Душанбе ба куллӣ  тағйир ёфта, ба маркази илмиву фарҳангӣ  ва иқтисодиву молиявии кишвар табдил ёфтааст. Дар пойтахти кишвар олимону муҳаққиқон ва аҳли илму адаб ҷамъ шуда, ба забони тоҷикӣ  ҷони дубора бахшиданд ва ба он мақоми давлатӣ  доданд. 
Инчунин зикр гардид, ки  мо сокинони Душанбешаҳр бояд маърифати шаҳрнишиниро баланд бардорем, ҳар як кӯчаву хиёбон ва дарахту гулгаштҳои шаҳрамонро  ҳифз намоем.