Ҷаласаи 10-уми ИБ СҲШ
Душанбе, 16.04.2014. (АМИТ «Ховар», Лайло Тоирӣ).- Рӯзҳои 17-18-уми апрел 10-умин ҷаласаи Иттиҳоди байнибонкии Созмони Ҳамкории Шанхай (ИБ СҲШ) бо ибтикори Бонки давлатии амонатгузории Ҷумҳурии Тоҷикистон «Амонатбонк» ҳамчун Бонки раисикунанда дар меҳмонхонаи «Серена»-и шаҳри Душанбе баргузор мегардад. Дар он масъалаҳои рушди ҳамкориҳои минбаъда мавриди баррасӣ қарор мегиранд. Хотиррасон мекунем, ки 15-уми апрел иштирокчиёни ҷаласаи Иттиҳоди байнибонкии Созмони Ҳамкории Шанхай ба шаҳри Душанбе ташриф оварданд. Дар ин ҷаласа масъалаҳои молиявӣ, фаъолияти бонкҳои узви ин созмон, ҳамкориҳои мутақобилаи бонкҳо дар самтҳои мухталифи бонкдорӣ, механизми иҷрои лоиҳаҳои сармоягузорӣ, ки давлатҳои узви ин созмон тарҳрезӣ ва дар амал татбиқ менамоянд, баррасӣ мегарданд. БДА ҶТ «Амонатбонк» аз соли 2008 ҳамчун узви Иттиҳоди Байнибонкии СҲШ қабул гардида дар ҳамаи ҷаласаҳои ИБ СҲШ иштирок менамояд.Бино ба маълумоти хадамоти матбуоти «Амонатбонк», аз таърихи 26 октябри соли сипаришуда Амонатбонк ҳамчун Бонки раисикунандаи ИБ СҲШ барои солҳои 2013 ва 2014 интихоб гардид. Ҷаласаи навбатӣ рӯзҳои 17-18-уми апрел дар меҳмонхонаи «Серена»-и Душанбе бо ибтикори «Амонатбонк» баргузор мегардад.