3,5 ҳазор доллар ба ғолибони пойга

Душанбе, 17.04.2014. (АМИТ «Ховар», Мавҷуда Анварӣ). —  19-апрели соли равон дар шаҳри Душанбе бахшида ба Рӯзи пойтахт ба масофаи 21 километру 97 метр ниммарафони байналмилалӣ аз рӯи масири дав-Наврӯзгоҳи Душанбе-хиёбони Ҳ. Шерозӣ-маҳаллаи Хоҷамбиё-дидбонгоҳи Чорбоғ-хиёбони Рӯдакӣ -майдони Дӯстӣ баргузор мегардад.
Бино ба иттилои Раёсати ҷавонон, варзиш ва сайёҳии шаҳри Душанбе имсол ниммарафони Душанбе ба рӯйхати мусобиқоти дави ҷаҳонӣ шомил шудааст. Ҷиҳати ширкат ба ин чорабинии варзишӣ, маротибаи панҷум доир мешавад, ба ҷуз варзишгарони тоҷик давандаҳои касбӣ аз бародаршаҳрҳои Душанбе варзишгарони Афғонистон, Беларус, Кения, Қазоқистон, Қирғизистон,  Русия, Ӯзбекистон, Украина ва Эрон дархост фиристодаанд.
Барои баргузории ниммарафони байналмилалӣ аз буҷаи шаҳрдорӣ 202 ҳазор сомонӣ, муодили зиёда аз 40 ҳазор доллари амрикоӣ ҷудо шудааст.  Ғолибони пойга миёни мардону занон бо мукофотпулӣ ба маблағи 3,5 ҳазор доллари амрикоӣ сарфароз гардонида мешаванд. Ҳамчунин ба ғолибони ҷойи 2-юм 3000, 3-юм-2500, 4-ум-2000, 5-ум-1800 ва 6-ум-1500 долларӣ дода мешавад.  Мукофотро ба ғолибони пойга дар маросими ботантана раиси шаҳри Душанбе Маҳмадсаид Убайдуллоев месупорад.