Баландтарин сутунпояи парчами миллӣ дар Суғд
Хуҷанд, 01.04.2014. (АМИТ “Ховар”, Абдуаҳад Шарифзода).- Дар маркази вилояти Суғд сутунпояи парчами миллии Тоҷикистон қомат афрохт. Он дар назди саҳни бинои ҳукумати вилояти Суғд ҷойгир буда, баландиаш 55 метр мебошад. Он ба Хуҷандшаҳр ҳусну шаҳомати дигареро зам намуд.
Тавре аз идораи кабудизоркунии шаҳр иттилоъ доданд, дар ин мавзеъ дар масоҳати 2000 метри мураббаъ сафолакҳо пӯшонида шуда, наздик ба 150 бех навъи дарахту ниҳолҳои палма, туя ва ёси ҳиндӣ шинонида мешавад.
Мувофиқи иттилои мақомоти иҷроияи вилоят ифтитоҳи расмӣ ва бардошти парчам дар ин сутунпояи 55 метра, ки баландтарин дар Суғд ба шумор меравад, аввали моҳи апрел дар назар аст.
Ба иттилои масъулин дар оянда дар ин минтақа боғи Парчами миллии Тоҷикистон ва дар шафати он Боғи устод Рӯдакӣ бунёд мешавад.
Бояд гуфт, ки санги асоси сутуни 55 метраи парчами Тоҷикистон дар шаҳри Хуҷанд моҳи декабри соли 2013 гузошта шуда , лоиҳаи онро ширкати «Суғдшаҳрофар» омода намудааст.