Баррасии вазъи мухаддиротӣ миёни Р.Назаров ва Н.Билисбеков

 Душанбе, 30.04.2014 (АМИТ «Ховар», Мавҷуда Анварӣ).- Дирӯз дар Агентии назорати маводи нашъаовари назди Президенти ҶТ вохӯрии директори агентӣ Рустам Назаров бо ҳайати вакилони Қазоқистон таҳти роҳбарии муовини раиси Кумитаи амнияти миллии Ҷумҳурии Қазоқистон Нургалӣ Билисбеков баргузор гардид.
Дар вохӯрӣ тарафҳо оид ба масъалаҳои рушди дуҷониба мубодилаи афкор намуданд ва самтҳои афзалиятноки фаъолиятро дар самти мубориза бар зидди муомилоти ғайриқонунии маводи нашъаовар муайян намуданд. Диққати махсус ба вусъатёбии вазъияти вобаста ба маводи нашъаовар дар минтақаи Осиёи Марказӣ ва Ҷумҳурии Исломии Афғонистон равона карда шуд.
Яке аз самтҳои афзалиятноки ҳамкории дутарафа — мубодилаи иттилооти фаврӣ нисбат ба саркардагон ва аъзои гурӯҳҳои ҷинояткори фаромиллӣ ва ташкил намудани чорабиниҳо оид ба бартараф намудани онҳо муайян гардид.
Тарафҳо инчунин масъалаҳои усулҳои арзёбии маводи нашъаовари афғониро, ки тавассути “Хатсайри шимолӣ” мегузарад, муҳокима намуданд.