Беҳтарин полисменҳои Душанбе

 
              Душанбе, 22.04.2014.(АМИТ “Ховар”,Марзия Саидзода).-Се нафар аз нозирони минтақавӣ дар пойтахт зимни ҷамъбасти озмуни «Беҳтарин нозири минтақавии сол» ғолиб дониста шуда, соҳиби ҷоизаҳо гардиданд. Инҳо Муродмад Калонов- подполковники милитсия, сардори минтақаи маъмурии милитсияи №26 шуъбачаи ҳифзи тартиботи ҷамъиятии шуъбаи Вазорати корҳои дохилӣ-2  /ВКД/ дар ноҳияи Синои пойтахт ғолиби зинаи аввали озмун,  Ҳокималӣ Маҳмудов-майори милитсия, сарнозири минтақаи маъмурии милитсияи №7 шуъбачаи ҳифзи тартиботи ҷамъиятии шуъбаи ВКД дар ноҳияи Шоҳмансур ҷои дуюм,  Саидмуҳаммад Акобиров — лейтенанти калони милитсия, сарнозири минтақаи маъмурии милитсияи №15 шуъбачаи ҳифзи тартиботи ҷамъиятии шуъбаи ВКД дар ноҳияи Фирдавсӣ ғолиби зинаи сеюми озмун мебошанд.
           Ба ғолибони озмуни шаҳрии “Беҳтарин нозири минтақавии сол” Маҳмадсаид Убайдуллоев зимни маҷлиси тантанавӣ, ки  ба ифтихори Рӯзи пойтахт доир гардид, дар баробари супоридани Шаҳодатномаи мақомоти иҷроияи маҳаллии ҳокимияти давлатӣ дар шаҳри Душанбе, инчунин  ба ғолиби зинаи аввал 15 000 сомонӣ, ғолиби зинаи дуюм 12 000 сомонӣ ва ба ғолиби  ҷои сеюм 10 ҳазор сомонӣ тақдим намуд.
         Озмуни мазкур бо мақсади баланд бардоштани нақши нозирони минтақавии  милитсия дар  таъмини тартиботи ҷамъиятӣ,  амнияти шаҳрвандон, ошкор ва пешгирӣ намудани ҳуқуқвайронкунӣ, мубориза бо ҷинояткорӣ  ва таҳкими робитаи онҳо бо ҷомеа гузаронида шуд.