Бе пардохт ба чемпионат роҳ дода намешавед!

  Душанбе, 01.04.2014. (АМИТ «Ховар», Мавҷуда Анварӣ). -5-уми апрели соли ҷорӣ қарор буд, ки 23-юмин мусобиқаи Тоҷикистон оид ба футбол миёни дастаҳои лигаи олӣ оғоз шавад, аммо он ба вақти дигар гузошта шуд.
Тибқи иттилои Федератсияи футболи Тоҷикистон чемпионати мазкур 12 апрел шурӯъ хоҳад шуд. Далели ин таъхирро манбаъ дар сари вақт пардохт накардани маблағи дархост аз ҷониби клубҳои “Энергетик” (Душанбе), “Далерон-Уротеппа” (Истаравшан), “Парвоз” (Бобоҷон Ғафуров), “Равшан” (Кӯлоб) ва ССКА “Помир (Душанбе) ва таҳия нашудани асноди зарурии тимҳо барои ширкат дар мусобиқа рабт дод. 
Кумитаи иҷроияи ФФТ муҳлати ниҳоии пешниҳоди маблағҳоро 9 апрел муайян кардааст. “Кумитаи иҷроия раҳбарияти клубҳои “Энергетик”, “Далерон-Ӯротеппа”, “Парвоз”, “Равшан” ва ССКА “Помир”-ро ҳушдор дод, ки дар сурати сари вақт пардохт накардани маблағ ва таҳияи ҳуҷҷатҳо дастаҳо ба чемпионат роҳ дода намешаванд”,-афзуд манбаъ.