Боздиди намояндагони Сафорати ИМА аз МОИ «Суғд»
Душанбе, 11.04.2014. (АМИТ «Ховар, Лайло Тоирӣ). – 9 апрел намояндагони Сафорати ИМА дар Тоҷикистон Эрик А. Салзман, муовини роҳбари шуъбаи сиёсат ва иқтисод Грэҳам Визговски аз Минтақаи озоди иқтисодии «Суғд» дидор намуданд, ки мақсад аз он шиносоӣ бо фаъолияти минтақаи мазкур ва ҷустуҷӯи роҳҳои барқарор намудани робитаҳо ба манзури ҳамкории дуҷониба буд.
Роҳбари маъмурияти Минтақаи озоди иқтисодии «Суғд» Фирдавс Олимов ба меҳмонон аз фаъолияти минтақа нақл карда, шароити имтиёзнокеро, ки барои роҳандозии соҳибкорию тиҷорат дар ҳудуди Минтақаи озоди иқтисодӣ фароҳам оварда шудааст, ба таври махсус қайд намуд. Мавсуф ҳамчунин аз фаъолияти ниҳодҳои тиҷоратӣ, ҳамчунин нишондодҳои ҳаҷми тавлиди маҳсулот ва хидматрасонии сохторҳои Минтақаи озоди иқтисодӣ муфассал нақл кард.
Дар ҷараёни мулоқот Эрик А.Салзман ба масоили расмиятҳои гумрукӣ, шартҳои воридоту содироти маҳсулот ва ашёи хом дар ҳошияи низоми Минтақаи озоди иқтисодӣ ва ҷараёни бақайдгирии ниҳодҳо мароқ зоҳир намуд.
Меҳмонон ҳамчунин аз корхонаи «Силкоат Бойя» дидан карда, дар ҷараёни он Эрик А.Салзман бо роҳбарият ва кормандони корхона шахсан сӯҳбат намуд.