Боздиди намояндаи Палатаи савдои Швейтсария аз МОИ Суғд

Хуҷанд, 02.04.2014. (АМИТ «Ховар, Абдуаҳад  Шарифзода ). —  Аъзои  раёсати  Палатаи муттаҳиди савдои  Швейтсария – Русия – ИДМ  Юрий  Морару  аз  минтақаи  озоди  иқтисодии  Суғд  боздид  намуд. 
Мақсад  аз  боздид  шиносоӣ  бо  муҳити  тиҷоратии  Тоҷикистон  ва  рушди  имконпазири  равобити  байни  тоҷирону  соҳибкорон  ва  муносибатҳои  байни  намояндагони  аҳли  тиҷорати  Швейтсария  ва  Тоҷикистон  аст. 
Роҳбари  маъмурият  Ф.Олимов   меҳмонро бо  фаъолияти  минтақаи  озоди  иқтисодии  Суғд  шинос  карда,  шартҳои  имтиёзноки  пешбурди  тиҷорат  дар  ҳудуди  минтақаи  озоди  иқтисодӣ,  ҳамчунин  фаъолияти   муштараки  корхона  ва  кишварҳои  дигарро  қайд  намуд.  Ф.Олимов  ҳамчунин  дар   бораи  бунёди  шохаи  роҳи  оҳани  Спитамен  ва  Минтақаи  озоди  иқтисодии Суғд  ва  ғайра  муфассал  нақл  кард.
Юрий  Морару  дар  навбати  худ  изҳор  дошт, ки  Палатаи  муттаҳиди  савдои  Швейтсария – Русия – ИДМ  созмони  асосии  ғайриҳукуматии  Швейтсария  буда,  ба  рушти  муносибатҳои  дуҷонибаи  тиҷоратию  иқтисодии  байни  Швейтсария,  Русия  ва   кишварҳои дигари  Иттиҳоди  Давлатҳои  Мустақил  мусоидат  мекунад. Ширкатҳои  соҳаҳои  мухталифи  саноат,  молия,  савдо  ва бахшҳои  дигар  аъзои  палата  мебошанд.
Дар  ҷараёни  мулоқот ҳамчунин  самтҳои  ҳамкории   дарозмуддати  дуҷониба   мавриди  муҳокима  қарор  гирифтанд.