Чкалов: Ярмаркаи ҷойҳои корӣ
Душанбе, 29.04.2014. (АМИТ «Ховар», Ситораи Боймурод).- Имрӯз дар боғи фарҳангӣ-истироҳатии ба номи Садриддин Айнии шаҳри Чкалов шуъбаи Агентии меҳнат ва шуғли аҳолии шаҳр бо дастгирии мақомоти иҷроияи ҳокимияти давлатии шаҳр ярмаркаи ҷойҳои кориро ташкил намуд.
Бояд гуфт, ки дар ярмаркаи мазкур дар баробари корхонаву ташкилотҳои шаҳри Чкалов, инчунин намояндагони шаҳру навоҳии Хуҷанд, Қайроққум ва ноҳияи Бобоҷон Ғафуров ширкат варзиданд. Дар маҷмӯъ, аз ҷониби 35 корхонаву ташкилот 737 ҷойи кор ба корҷӯён пешниҳод шуд. Бино ба гуфти масъулин дар ин рӯз тавассути ярмарка 12 нафар корҷӯй ба ҷои кори доимӣ роҳхат гирифт ва 11 нафари дигар ба касбомӯзӣ фаро гирифта шуд.
Тибқи иттилои Санҷар Раҳмонқулов, сардори шуъбаи Агентии меҳнат ва шуғли аҳолии шаҳр то имрӯз аз ҷониби шуъбаи мазкур 4 маротиба ярмаркаи ҷойи кор гузаронида шуд, ки дар ин замина ҳудуди 100 нафар бо ҷои кори доимӣ таъмин гардида, 25 нафар ба касбомӯзӣ ҷалб шуд.