Фархор: фабрикаи ресандагии «Фаррес» фаъол мегардад

Фархор,  21.04.2014. (АМИТ «Ховар», Сулаймони Хол).-Дар ноҳияи Фархор  истеҳсоли маҳсулотҳои саноатӣ сол аз сол афзоиш ёфта,  масъулини корхонаҳо истеҳсоли маҳсулоти худиро дар бозорҳои дохилӣ  таъмин менамоянд. 
Тавре  ки сармеъмори ноҳия Саидобид Ҳафизов  иброз дошт, то ин давра   корхонаҳои саноатии ноҳия  ба миқдори  14 млн. 327 ҳазору 500 сомонӣ  маҳсулоти саноатӣ истеҳсол намуданд, ки он ба  48% -и нақшаи ҳамин давраи соли гузашта баробар мебошад.  Саноатчиён дар се моҳи соли ҷорӣ   371 тонна  нахи пахта,  144 тонна равған,  1941 тонна орд, 192,2 тонна нон ва маҳсулоти нонӣ истеҳсол намуданд.  
Бо мақсади таъсиси ҷойҳои нави корӣ дар назар дошта шудааст, ки  моҳи апрели соли ҷорӣ  фабрикаи ресандагии ҶДММ  «Фаррес»  ба кор шуруъ намуда,  инчунин дар ҷамоати деҳоти Зафар  бо ибтикори соҳибкор  Акбаршоҳ Неъматов  сохтмони  фабрикаи ресандагӣ, ки  иқтидори солонааш  коркарди 4000 тонна  нах мебошад,  дар моҳи майи соли ҷорӣ оғоз гардад.