Имзои Ёддошти тафоҳум дар ВКД

  Душанбе, 18.04.2014. (АМИТ «Ховар», Лайло Тоирӣ).- Имрӯз, 18-уми апрел  вазири корҳои дохилӣ генерал-лейтенанти милитсия Раҳимзода Рамазон Ҳамро бо ҳайати намояндагони Ҷумҳурии Мардумии Чин таҳти роҳбарии аъзои Шӯрои давлатӣ, вазири бехатарии ҷамъиятии Ҷумҳурии Мардумии Чин  Го Шенкун  вохӯрд.
Раҳимзода Рамазон Ҳамро ба Вазорати бехатарии ҷамъиятии Ҷумҳурии Мардумии Чин барои дастгирӣ ва ҳамкорӣ дар мубориза алайҳи терроризм, экстримизм, гардиши ғайриқонунии маводи нашъаовар ва дигар зуҳуроти наматлуб миннатдорӣ баён намуд. Вазир  аз ҷумла зикр  намуд, ки дар 5 соли охир аз ҷониби мақомоти дахлдори ҷумҳурӣ беш аз 16 тонна маводи нашъадор мусодира гардид, ки дар ин самт  саҳми ВКД  низ назаррас мебошад. 
Дар вохӯрӣ инчунин зикр шуд, ки Президенти мамлакат ба ҳамкории дуҷонибаи ҳарду вазорат диққати зиёд  медиҳад. 
Ҷониби Чин низ омодагии худро барои вусъат додани ин ҳамкориҳо дар оянда баён намуд. 
Дар фарҷоми вохӯрӣ ҷонибҳо Ёддошти тафоҳум оид ба ҳамкориҳои дуҷониба байни Вазорати корҳои дохилии ҶТ ва Вазорати бехатарии ҷамъиятии Ҷумҳурии Мардумии Чинро  ба имзо расониданд.