Кӣ сазовори «Калидчаи заррин» гардид?

Душанбе, 03.04.2014. (АМИТ «Ховар», Мавҷуда Анварӣ). — Бо мақсади ташвиқу тарғиби риояи қоидаҳои бехатарӣ аз сӯхтор дар байни мактаббачагон, баланд бардоштани ҳисси ватандӯстию меҳанпарастӣ ва зиёд намудани ифтихори миллии онҳо аз тарафи мутахассисони дидбонгоҳи алоҳидаи ҳарбии Хадамоти давлатии оташнишонии ноҳияи Варзоб дар ҳамкорӣ бо коршиносони сарраёсати ХДО ВКД ва Раёсати маорифи ноҳияи мазкур дар муассисаи таълимии №46-и ба номи Мирзоамин Ҳусейнови ҷамоати деҳоти Чорбоғи ноҳияи Варзоб, ки дар он зиёда аз 600 нафар муҳассил ва 39 нафар омӯзгор ба донишандӯзӣ ва фаъолият фаро гирифта шудаанд, озмуни «Калидчаи заррин» гузаронида шуд.
Дар озмун хонандагони синфҳои 3-юм байни худ қувваозмоӣ намуданд. Барои ҳарчӣ зиёдтар ба даст овардани холҳо дастаҳои «Сипар» ва «Оташак» кӯшиш намуданд, ки 5 шарти асосии озмунро бехато ва дар муддати кӯтоҳ иҷро намоянд. Аз рӯи натиҷаҳои дастаҳо ҳайати ҳакамон ҷойи аввалро ба дастаи «Сипар» ва ҷойи дуюмро ба дастаи «Оташак» сазовор донист.
Дар интиҳои чорабинӣ ба ғолибон ва иштирокчиёни озмун ифтихорнома ва туҳфаҳои хотиравӣ супорида шуданд.