Конститутсия -бахтномаи миллат

Душанбе, 23.04.2014. (АМИТ «Ховар», Лайло Тоирӣ).- «Конститутсия ҳамчун бахтномаи миллат ва санади бунёдии сиёсӣ роҳи минбаъдаи пешрафти тараққиёти давлати озоди моро муайян менамояд. Сарқонуни кишвар Тоҷикистони моро дар  ҷомеаи ҷаҳонӣ ҳамчун давлати мустақили дорои низоми мукаммали сиёсиву ҳуқуқӣ муаррифӣ намуд, ки дар он инсон ва ҳуқуқу озодиҳои ӯ арзиши олӣ буда, барои шароити зиндагии арзанда ба ҳар шахс заминаҳои устувори иҷтимоиву иқтисодӣ гузошта шудааст»,- таъкид сохт имрӯз, 23 март Президенти Ҷумҳурии Тоҷикистон Эмомалӣ Раҳмон дар Паёми худ  ба Маҷлиси Олии Ҷумҳурии Тоҷикистон.
Конститутсия барои аз байн бурдани хатаре, ки ба истиқлолияти давлатӣ таҳдид менамояд, шароити зарурии ҳуқуқӣ муҳайё карда, барои аз нобудӣ наҷот додани давлати тозаистиқлоли тоҷикон ва аз парокандагӣ раҳоӣ бахшидани миллати тоҷик асос гузошт. Ҷиҳати расидан ба ваҳдати миллӣ таҳкурсӣ устувор гардид ва он дар марҳалаи ҳассоси таърихи барои гузоштани асосҳои аркони давлатдории тоҷикон нақши тақдирсозу  ҳалкунанда бозид.