Кумаки Катоюн ба китобхона
Хоруғ, 26.04.2014. (АМИТ «Ховар», Файз Мирасан).- Сокини шаҳри Душанбе Катоюн Рустамова зиёда аз ҳазор китоби илмию бадеиро аз китобхонаи шахсии худ ба китобхонаи вилоятии ба номи Абуабдуллои Рӯдакии ВМКБ тақдим намуд.
-«Аслан ин китобхона ба падарам, ки чанд сол дар Донишгоҳи давлатии Хоруғ ба сифати устод фаъолият дошт, тааллуқ дорад,-мегӯяд Катоюн Рустамова. Баъдан мо ба пойтахти кишвар баргаштем ва падарам фаъолияти омӯзгории худро дар Донишгоҳи Миллии Тоҷикистон идома дод. Чанд сол қабл падарам Фаромӯз Рустамов аз олам даргузашт ва васият намуд, ки як қисми китобҳоро ба Донишгоҳи давлатии Хоруғ тақдим намояд. Имрӯз ман ин васияти қиблагоҳамро ба иҷро расондам»,-гуфт Катоюн Рустамова
Директори китобхона Алидод Чароғабдолов бо изҳори минатдорӣ аз ин хонавода гуфт, ки дар чанд соли охир аз ҳисоби сокинони шаҳру навоҳии вилоят ба китобхонаи мо садҳо асарҳои илмию бадеӣ ва бачагона ворид гашт. Алъон мо имкон дорем, донишҷӯёну хонандагони макотиби миёнаро аз адабиёти зарурӣ таъмин кунем ва афзуд, ки дар айни ҳол баъзан хонандагон дар толори китобхона ҷои нишаст пайдо карда наметавонанд ва интизор мешаванд.