Манъи истифодаи фонограмма дар «Андалеб-2014»

  Душанбе, 16.04.2014. (АМИТ «Ховар»,Фарзона Достонзода).- Фестивал-озмуни ҷумҳуриявии телевизионии эҷодиёти халқ «Андалеб-2014» бо иштироки фаъолонаи ҳаваскорони санъати ҳамаи шаҳру ноҳияҳои мамлакат дар ду навбат баргузор мегардад. Тавре ки ба АМИТ «Ховар» аз Вазорати фарҳанги кишвар иттилоъ доданд, даври аввали озмун аз 1 марти соли 2014 дар  маҳалҳо бо салоҳдиди мақомоти иҷроияи ҳокимияти давлатии шаҳру ноҳияҳо бо таъсиси кумитаҳои тадорукот ва ҳайати ҳакамон аз ҳисоби мутахассисони варзидаи соҳа, олимону адибон, мақомоти маҳаллии ҳокимияти иҷроия, раёсатҳо, шуъбаҳо, бахшҳои фарҳанг ва телевизиону радиои маҳаллӣ баргузор гардида, то 15 майи соли 2014 ҷамъбаст ва ғолибон муайян шуда, ба вазорат пешниҳод мегарданд.
Ғолибони даври аввали озмун аз ВМКБ ду дастаи ҳунарӣ, аз вилояти Суғд ду дастаи ҳунарӣ, аз вилояти Хатлон (минтақаи Кӯлоб ва Қурғонтепа) чор дастаи ҳунарӣ интихоб гардида, ба даври дуюм ҳуҷҷатҳо оид ба ҷамъбасти озмун- протоколҳои ҳайати ҳакамон, барномаҳои ҳунарӣ, руйхати иштирокчиён ирсол мегарданд.
Даври дуюми озмун аз 4 то 22 августи соли 2014 бо иштироки дастаҳои ҳунарии ғолиб аз шаҳру ноҳияи ҷумҳурӣ дар толори Филармонияи давлатии Тоҷикистон ба номи Акашариф Ҷўраев доир мегардад.
Дар доираи барномаҳои фестивал-озмун истифодаи фонограмма, асбобҳои барқии мусиқӣ, ҷалби ҳунармандони касбӣ (ғайр аз коргардон ва устоди рақс), ҳаваскорони дигар маҳалҳо, либосҳо ва жанрҳое, ки дар низомномааи мазкур зикр нагардидаанд, (хор, эстрада), нигораҳои осорхонаҳо манъ аст.