Маъракаи гусели наваскарон ба хизмат

Б.Ғафуров, 8.04.2014. (АМИТ “Ховар”, Абдуаҳад Шарифзода).-Шурӯъ аз 1 апрели соли ҷорӣ дар ҷумҳурӣ даъвати баҳории наваскарон ба хизмати ҳатмии ҳарбӣ  оғоз гардид. Дар робита ба ин имрўзҳо дар шаҳру ноҳияҳои кишвар маъракаи гусели нахустин гурӯҳи наваскарон идома дорад. 
Чунин як чорабинӣ дар хиёбони марказии ба номи Бобоҷон  Ғафурови ноҳияи Бобоҷон Ғафуров доир гардид. Дар ин рӯз аз истгоҳи роҳи оҳани Хуҷанд ба сафи Қувваҳои мусаллаҳи ҷумҳурӣ зиёда аз 600 нафар аввалин ихтиёриёни шаҳру ноҳияҳои шимоли кишвар фиристода шуданд. Дар маросими гусел масъулини мақомоти иҷроияи ҳокимияти давлатии ноҳия, намояндагони комиссариати ҳарбии вилоят, собиқадорони ҷангу меҳнат, фаъолону ҷавонон ва  волидайни наваскарон  иштирок намуда, зикр  карданд, ки  хидмат  дар  сафи Артиши миллӣ вазифаи муқаддаси  ҳар  як шаҳрванди  кишвар  аст.
Бояд гуфт, ки ҳамасола аз вилояти Суғд ба қисмҳои ҳарбии мамлакат зиёда аз 2 ҳазор ҷавон  сафарбар мешавад.