Маркази нави ҳавосанҷӣ дар Варзоб

Душанбе, 08.04.2014 (АМИТ «Ховар», Фарзонаи Давлат).- Дирӯз дар стансияи кӯҳии ботаникии Кондараи Варзоб марказ барои санҷидани вазъи гуногуни обу ҳавои ҷумҳурӣ кушода шуд.Тавре ки дар ин бора котиби масъули Академияи илмҳои Тоҷикистон Сайёҳат Иброҳимова хабар дод, дар чорабинӣ ҷиҳати ба истифода додани маркази мазкур Фарҳод Раҳимов, президенти Академияи илмҳои Тоҷикистон, Ҳикмат Ҳисориев, директори Институти ботаника, физиология ва генетикаи растании АИТ, Абдусаттор Саидов, директори Институти зоология ва паразитологияи АИТ ва дигар масъулини соҳа иштирок доштанд.Ба иттилои манбаъ, стансияи мазкур моҳи ноябри соли 2013 дар чорчӯбаи шартномаи ҳамкориҳои илмии Институти экология ва ҷуғрофияи Академияи илмҳои Ҷумҳурии Мардумии Чин ва Институти ботаника, физиология ва генетикаи растании АИТ, ҳамчун ёрии маҷҷонӣ ба стансияи кӯҳии ботаникии Варзоб (Кондара) таҷҳизоти обу ҳавосанҷии рақамии ҳозиразамон оварда насб шуд, ки ба олимони ин соҳа баҳри муайян намудани вазъи боду ҳавои кишвар ва дигаргуншавии иқлим имконияти бештарро фароҳам меорад.