Масъули комиссариат:ҷавонон ба саломатии худ аҳамият намедиҳанд
Хоруғ, 25.04.2014. (АМИТ «Ховар», Файз Мирасан).- Бо баргузории барномаҳои ахлоқию тарбиявӣ, ватандорию ватанпарварӣ аз сӯи кормандони комиссариати ҳарбии ВМКБ ва муассисахои таълимию фарҳангӣ дар миёни наврасону ҷавонон маъракаи даъвати баҳории ҷавонписарон ба сафҳои ҷузъу томҳои Артиши Миллӣ, ниҳодҳои сохторҳои қудратӣ ва ситоди ҳолатҳои фавқулода мувофиқи матлаб идома дорад.
Муовини комиссари ҳарбии вилоят Беҳзод Саидиброҳимов гуфт, ки аллакай ноҳияҳои Дарвозу Ванҷ, Рӯшону Шуғнон, Ишкошиму Мурғоб нақшаи даъвати баҳориро дар муҳлати кӯтоҳтарин таъмин намуданд. Як чиз моро хушҳол месозад, ки аксарияти ҷавонон имсол бо хоҳиши худ ба нуқтахои сафарбаркунӣ омада, довталабона ба хизмати ватан раҳсипор шуданд.
Ба гуфти ин масъули комиссариати низомӣ як чиз нигаронкунанда аст, ки иддае аз ҷавонон ба саломатии худ аҳамияти ҷиддӣ намедиҳанд, ба варзиш машғул намешаванд, ҳарчанд дар тамоми шаҳру деҳот толору майдончаҳои варзишӣ мавҷуданд. Бинобар ин комиссариатҳои низомӣ, мактабҳои варзишӣ ва дигар муассисаҳои марбутаро зарур аст, ки ба ин паҳлуи ҳаёти кӯдакону наврасон ва ҷавонон аҳамияти бештар диҳанд.