Муҳокимаи масоили ташкили хушсифати ҳаракат дар роҳ

Душанбе, 23.04.2014. (АМИТ «Ховар,  Екатерина  Пасторова). —  Имрӯз,  23  апрел,  дар  шаҳри  Душанбе  дар  ҳошияи   лоиҳаи  Барномаи  рушди  СММ – «Дастгирии идораи  устувори нақлиёт  дар  шаҳри  Душанбе»  семинар  аз  рӯи   масоили  идораи роҳ  ва рӯи  кор  овардани аломатҳо  барои  велосипедронони пойтахти  Тоҷикистон баргузор  гардид. 
Иштирокдорони асосии семинар  — роҳбарони   корхонаҳои  воҳиди давлатии «Автобус – 1», «Автобус – 2», «Автобус – 3», «Троллейбус», ҳамчунин  намояндагони  Ҳукумати  пойтахт, Корхонаи  воҳиди давлатии «Душанбенақлиётхадамотрасон», Бозрасии давлатии  автомобили  шаҳри  Душанбе ва муассисаҳои  дигари  пойтахт  имкон   доштанд, ки   усулҳои  идораи  самарабахши ҳаракат  дар  роҳ  ва рӯи  кор овардани  аломатҳо  барои   велосипедрононро  омӯхта,  ҳамчунин  бо таҷрибаи  кишварҳои  мутараққӣ  дар  ин  росто  шинос  шаванд. 
Иштирокдорони  семинар   ҳамчунин   масъалаи  гузоштани   аломатҳо  барои  нақлиёти  ҷамъиятӣ,   низоми  фурӯши  чиптаҳо  ва  фаъолияти  маркази  диспетчериро  мавриди  муҳокима  қарор  доданд.
Хотирнишон  месозем, ки  мақсад  аз  лоиҳаи  «Дастгирии  идораи  устувори   нақлиёт  дар  шаҳри  Душанбе»  иборат  аз   коҳиш  додани  теъдоди  партовҳои  моддаҳои  ифлоскунанда  ва буғу бухор ба ҳаво,  беҳдошти  дастрасии  ҳамаи  сокинони  шаҳри  Душанбе  ба хидматрасонии   хушсифати  нақлиёти  ҷамъиятӣ   мебошад.