Мулоқоти ректори ДМТ бо толибилмони Хуҷанд

Хуҷанд, 05.04.2014. (АМИТ “Ховар”, Абдуаҳад Шарифзода).-Дирӯз дар шаҳри Хуҷанд вохӯрии роҳбарияти Донишгоҳи Миллии Тоҷикистон бо хатмкунандагони мактабҳои шаҳр доир гардид. Дар вохӯрӣ раиси шаҳри Хуҷанд Раҷаббой Аҳмадзода, ректори Донишгоҳи Миллии Тоҷикистон Маҳмадюсуф Имомов ва чанд устоду масъули ин муассисаи таълимии олии кишвар иштирок доштанд. Мақсади чорабинии мазкур- ин ошно намудани хонандагони синфҳои болоии мактабҳои маркази вилоят – Хуҷандшаҳр бо сатҳу сифати таълим дар ин боргоҳи илм буд. 
Ректори Донишгоҳи Миллии Тоҷикистон (ДМТ) Маҳмадюсуф Имомов зикр кард, ки ДМТ яке аз марказҳои таълимию илмии бонуфузи кишвар ба ҳисоб рафта, он барои тақвияту такмили донишу маҳорат ва истеъдоди донишҷӯёни худ мактаби пурқувватро доро буда, алъон дар 17 факултаи он аз рӯи 92 ихтисос таълим дода мешавад.  
Дар вохӯрӣ шаҳрдори Хуҷанд изҳори умедворӣ намуд, ки хонандагони болаёқати дабиристонҳои шаҳр пас аз хатм таҳсили худро дар қатори дигар макотиби олии кишвар дар ин макони бонуфузи маърифату илм идома хоҳанд дод.