Мусодираи 102 тонна маводи мухаддир дар 20 сол

Душанбе, 03.04.2014. (АМИТ «Ховар», Муқаддас Темурзода).- Тибқи иттилои Агентии назорати маводи нашъаовари назди Президенти Ҷумҳурии Тоҷикистон, дар давоми 20 соли охир дар ҳудуди ҷумҳурӣ аз ҷониби мақомоти ҳифзи ҳуқуқ ва сохторҳои қудратӣ аз муомилоти ғайриқонунӣ зиёда аз 102 тонна воситаҳои нашъадор мусодира шуданд. Аз ин миқдор 32,7 тонна героин, 36,3 т афюн, 31,7 т маводи нашъадори гурӯҳи бангдона ва 1,3 тонна дигар намуди воситаҳои нашъадор мебошанд. 
«Тамоюли зиёдшавии мусодираи воситаҳои нашъадор, ки баъди соли 2010 оғоз шуд, дар соли 2013 идома ёфт. 
Дар ин давра дар ҷумҳурӣ миқдори мусодираи маводи мухаддир  71,3 % зиёд шуда, аз 3902,7 кг дар соли 2010 то 6686,5 кг дар соли 2013 афзоиш ёфтааст»,- зикр менамояд сарчашма.