Натиҷаҳои сафари расмии С. Аслов ба Озарбойҷон
Душанбе, 3.04.2014. (АМИТ «Ховар»). -2-3 апрели соли 2014 сафари расмии Вазири корҳои хориҷии Ҷумҳурии Тоҷикистон Сироҷидин Аслов ба Ҷумҳурии Озарбойҷон доир гашт.Дар доираи сафари расмӣ мулоқотҳои Вазири корҳои хориҷӣ Сироҷидин Аслов бо Вазири корҳои хориҷии Озарбойҷон Элмар Мамедъяров ва Вазири иқтисод ва саноат, Ҳамраиси Комиссияи байниҳукуматии Тоҷикистону Озарбойҷон оид ба хамкориҳои иқтисодӣ Шоҳин Мустафоев баргузор гардиданд. Инчунин Президенти Ҷумҳурии Озарбойҷон Илҳом Алиев Вазири корҳои хориҷии Ҷумҳурии Тоҷикистонро ба ҳузур пазируфт.Зимни мулоқотҳо ҷонибҳо вазъ ва дурнамои ҳамкориҳои дуҷонибаро мавриди баррасӣ қарор дода, оид ба масъалаҳои мубрам ва ҷанбаъҳои сиёсии ҳамкорӣ дар доираи созмонҳои байналмилалӣ ва минтақавӣ мубодилаи афкор намуданд.Тарафҳо иброз доштанд, ки муносибатҳои дуҷонибаи Тоҷикистону Озарбойҷон дар заминаи принсипҳои боварӣ, ҳамдигарфаҳмӣ ва шарикии стратегӣ асос ёфта, муколамаи сиёсии сатҳи олӣ онҳоро бештар тақвият мебахшанд.Дар рафти вохӯрӣ, инчунин раванди иҷрои қарордодҳои дар сатҳи олӣ бадастомада ва санадҳои дуҷонибаи дар соҳаҳои сиёсӣ, тиҷоратию иқтисодӣ, илмию техникӣ ва фарҳангию гуманитарӣ имзошуда, мавриди баррасӣ қарор гирифтанд.Дар анҷоми гуфтушуниди вазирони корҳои хориҷӣ Барномаи ҳамкорӣ байни вазоратҳои корҳои хориҷии Тоҷикистону Озарбойҷон барои солҳои 2014-2015 ба имзо расонида шуд.