Омодагӣ ба V-умин ниммарафони байналмилалӣ

            
Душанбе, 02.04.2014.(АМИТ “Ховар”, Марзия Саидзода).- Ба ифтихори Рӯзи пойтахт, ки ҳамасола шанбеи сеюми моҳи апрел таҷлил мегардад, 19 апрел дар Душанбе V-умин ниммарафони  байналмилалӣ гузаронида мешавад. Дар ин хусус шаҳрдории Душанбе қарори марбута ба тасвиб расонд.
           Тибқи қарор Раёсати ҷавонон, варзиш ва сайёҳии шаҳри Душанбе муваззаф гардидааст, ки  дар ҳамкорӣ бо сохторҳои марбута бо инобати дархости пешниҳодгардидаи Федератсияҳои байналмилалӣ ҷиҳати таъмини расмиёти даъват ва иштироки варзишгарони варзида, кумак барои дарёфти раводиди онҳо тадбирҳои зарурӣ андешад. Инчунин Раёсати сармоягузорӣ ва идораи амволи давлатии пойтахт вазифадор гардидааст, ки  ҷиҳати ҷалби сарпарастон барои саҳм гузоштан дар баргузории ин мусобиқа унвонии раиси шаҳр пешниҳод ироа созад.
             Ҳадаф аз ташкили  ин чорабинии варзишӣ таъмини оммавияти тарбияи ҷисмонӣ ва варзиш, ташвиқу тарғиби ҳаракати байналмилалии варзиш дар кишвар аст.
Назорати иҷрои қарори мазкур ба зиммаи Руқия Қурбонова-муовини раиси шаҳри Душанбе вогузор гардидааст.