Оё тибқи квота дохилшавандагон имтиҳони тестӣ месупоранд?

Душанбе, 16.04.2014. (АМИТ «Ховар», Зарангези Латиф).- Довталабоне, ки хоҳиши шомил шудан ба муассисаҳои олии кишвар аз тариқи квотаи Президентиро доранд, агар аз имтиҳони муқарраргардида нагузаранд, дигар дар соли ҷорӣ наметавонанд ба ягон муассисаи олӣ дохил шаванд,-  гуфт сармутахассиси Раёсати таҳсилоти олии касбӣ ва баъдидипломии Вазорати маориф ва илми ҷумҳурӣ Сафарбой Самадов дар посух ба суоли хабарнигори АМИТ «Ховар».
Дар робита ба ин  Ситорабону Назарова, сухангӯи Маркази миллии тестии назди Президенти ҷумҳурӣ  гуфт: «Дар тамоми раёсатҳои маорифи шаҳру навоҳии мамлакат пеш аз муҳлати бақайдгирии довталабон дар Маркази миллии тестӣ  эълон карда шуд, ки он довталабоне, ки хоҳиши ба тариқи квотаи Президентӣ шомил шуданро доранд, метавонанд ҳамзамон ҳуҷҷатҳояшонро ба марказ супоранд, зеро дар сурати аз имтиҳони муқаррарии квота гузашта натавонистан дигар дар соли равон ҳуқуқи дохил шудан ба донишгоҳу донишкадаҳоро пайдо карда наметавонанд». 
Ёдрас мекунем, ки давраи иловагии бақайдгирандагон дар ММТ аз 16 то 30 апрели соли 2014 барои довталабоне, ки дар давраи асосии бақайдгирӣ аз қайд гузашта буданд, муайян шудааст.