Пасандозҳои шахсони воқеӣ 67,4 фоизро ташкил дод

Душанбе, 22.04.2014. (АМИТ «Ховар», Лайло Тоирӣ).-    Бино ба иттилои хадамоти матбуоти Бонки миллии Тоҷикистон сол то сол ҳаҷми пасандозҳои аҳолӣ дар бонкҳои ҷумҳурӣ зиёд шуда истодааст. Аз маълумоти расмӣ бармеояд, ки бақияи пасандозҳо дар ташкилотҳои қарзии ҷумҳурӣ дар интиҳои моҳи марти соли равон 5 млрд. 647,8 млн. сомониро ташкил намуд, ки нисбат ба ҳамин давраи соли гузашта 13,5 фоиз зиёд мебошад. 
     Таҳлили таркиби бақияи ҳаҷми пасандозҳо нишон дод, ки 32,6 фоиз (ё 1 млрд. 840,3 млн. сомонӣ)-ро пасандозҳои шахсони ҳуқуқӣ ва 67,4 фоиз (ё 3 млрд. 807,5 млн. сомонӣ)-ро пасандозҳои шахсони воқеӣ ташкил намуданд, ки ин аз баланд шудани боварии мардум ба бонкҳо шаҳодат медиҳад. 
     Дар моҳҳои январ-марти соли ҷорӣ фоизҳои миёнавазни пасандозҳо бо пули миллӣ 15,49 фоиз ва бо асъори хориҷӣ 12,11 фоизи солонаро ташкил намуданд.