Паём аз ҷониби ҳамватанон бо таваҷҷуҳи хосса истиқбол шуд

Душанбе, 24.04.2014. (АМИТ «Ховар», Мавҷуда Анварӣ). — Паёми Президенти Ҷумҳурии Тоҷикистон Эмомалӣ Раҳмонро ба Маҷлиси Олии кишвар дар аксар манотиқи Федератсияи Русия (ФР) низ ҳамватанони мо аз тариқи моҳвора ва интернет тамошо карданд. Дар шаҳри Краснодар барои тамошои дастаҷамонаи Паёми Сардори Давлат ҳамватанони мо — намояндагони касбу кори гуногун дар бинои ташкилоти ҷамъиятии тоҷикистониёни кишвари Краснодар -«Содействие» ҷамъ омаданд. Тоҷикони минтақаи Сибир низ паёми Сардори Давлатро дастаҷамона тамошо карданд. Бо ташаббуси ҷамъияти минтақавии тоҷикистониёни вилояти Новосибирск -«Дӯстӣ» бо роҳбарии Сияршо Абдуҷабборов ва соҳибкорони тоҷик Асомуддин Шоев ва Раҳимҷон Бобоҷонов дар шаҳри Новосибирск дар ду мавзеи будубоши оммавии ҳамватанони мо- дар марказҳои бонуфузи савдои шаҳр ташкил шуд.Мастибегим Ашӯрбекова, раиси ҷамъияти минтақавии тоҷикистониён — «Дидор» иттилоъ дод, ки Паёми Президенти мамлакат дар минтақаи Урали ФР низ аз ҷониби ҳамватанони мо бо таваҷҷуҳи хосса истиқбол шуд. Тамошои оммавии суханронии Сардори Давлат, ки тамоми паҳлӯҳои ҳаёти иҷтимоию сиёсии кишварро дар бар мегирифт, дар бинои ҷамъияти «Дидор» баргузор шуд. Тамошои дастаҷамонаи Паёми Сардори Давлат Эмомалӣ Раҳмон, ҳамчунин дар шаҳрҳои Маскав, Санкт-Петербург, Иваново, Самара, Сочи, ҳавзаҳои Шарқи дур ва Приволжие низ сурат гирифт. Дар ин бора ба АМИТ «Ховар» аз намояндагии Хадамоти муҳоҷирати Вазорати меҳнат, муҳоҷират ва шуғли аҳолии ЧТ хабар доданд.