Пешгирии нашъамандӣ дар байни наваскарон

Душанбе, 2.04.2014. (АМИТ «Ховар», Муқаддас Темурзода).- Ҳамасола дар моҳҳои апрел-май ва октябр-ноябр дар Тоҷикистон маъракаи даъвати ҷавонон ба сафи Қувваҳои Мусаллаҳи ҶТ баргузор мегардад.  Тавре ки аз маркази матбуоти  Агентии назорати маводи нашъаовари назди Президенти ҶТ хабар доданд, 1 апрел дар комиссариати ҳарбии ноҳияи Фирдавсӣ, зимни гузаронидани маъракаи тантанавии гусели даъватшудагон ба хизмати ҳарбӣ, кормандони Агентии назорати маводи нашъаовари назди Президенти ҶТ  якҷоя бо мудири бахши ҷавонони ноҳияи мазкур дар байни даъватшудагон вохурӣ гузарониданд. Мақсади вохӯрӣ пешгирии истифодаи маводи мухаддир дар байни ҷавонон, эмин нигоҳ доштани солимии насли наврас, васеъ намудани тасаввуроти онҳо дар бораи хатари маводи мухаддир буд. 
Ҳамчунин аз тарафи намояндагон оид ба вазъи вобаста ба маводи нашъаовар, оқибатҳои сар задани нашъамандӣ, сироятшавӣ ба бемориҳои ВНМО, Гепатити С, содиршавии ҷинояткорӣ дар байни ҷавонон ва наврасон суҳбатҳо баргузор гардиданд.  Дар вохӯрӣ раисони маҳаллаҳои ноҳияи Фирдавсӣ иштирок намуданд.