Соҳибкорони хонасоз аз пардохти фоиз озод гардиданд

 Душанбе, 1.04.2014.(АМИТ «Ховар», Марзия Саидзода).-Минбаъд 14 нафар соҳибкоре, ки дар минтақаи дуюми Нақшаи генералии шаҳр ба сохтмони биноҳои баландошёнаи истиқоматӣ машғуланд, аз супоридани 5% квартираҳои бунёдшаванда ба тавозуни шаҳрдории Душанбе озод мешаванд. Инчунин 2 соҳибкоре, ки дар минтақаи якуми шаҳр манзили баландошёнаи    истиқоматӣ месозанд, 5%-и квартираҳои бунёднамудаашонро ба тавозуни шаҳрдорӣ вогузор менамоянд. Қаблан он 10%-ро ташкил медод.
     Ҳамин тариқ, аз ин ба баъд зимни ҷудо намудани қитъаи замин аз сӯи шаҳрдорӣ соҳибкорон ҷиҳати сохтмони иморати манзили баландошёнаи бисёрҳуҷрадор дар минтақаҳои дуюм ва сеюми Нақшаи генералии пойтахт аз фоиз озод шуда ва он дар минтақаи якум 5% муайян карда шуд.
  Ин тадбир аз сӯи шаҳрдорӣ  бо мақсади татбиқи Нақшаи генералӣ, дастгирии соҳибкорӣ, ҷилавгирӣ аз баланд гардидани нархи манзили истиқоматии бисёрошёна андешида шудааст. Вале таҳлилҳо нишон медиҳанд, ки нархи манзили истиқоматӣ дар пойтахт то ҳанӯз гарон аст.