Талабот ба қарз қонеъ мегардад

   Душанбе, 3.04.2014. (АМИТ «Ховар», Лайло Тоирӣ).- Бақияи умумии қарзҳо дар ташкилотҳои қарзии кишвар дар моҳи феврали соли равон нисбат ба ҳамин давраи соли гузашта 38,7 фоиз зиёд гардида, 7’876,5 млн. сомониро ташкил дод. Аз ҷумла, 3’200,6 миллион  сомониро қарзҳо бо пули миллӣ ва 4’675,9 миллион сомониро қарзҳо бо асъори хориҷӣ ташкил доданд. 
     Бино ба иттилои Бонки миллии Тоҷикистон фоизи миёнавазни қарзҳо дар моҳи феврал бо пули миллӣ 26,58 фоиз ва бо асъори хориҷӣ 22,47 фоизи солонаро ташкил намуд. 
     Ҳаҷми қарзҳои хурди додашуда дар ду моҳи аввали соли ҷорӣ афзун гардида, нисбат ба ҳамин давраи соли қаблӣ 31,9 фоиз зиёд шуд. Аз ин ҳисоб ба ноҳияҳои дурдасти кӯҳистон 178,4 миллион сомонӣ қарзи хурд дода шудааст, ки нисбат ба ҳамин давраи соли гузашта 31,8 фоиз зиёд мебошад.