Талафоти ҷонӣ бар асари борони пуршиддат

 Душанбе, 14.03.2014. (АМИТ «Ховар», Мавҷуда Анварӣ). —  Шаби 12 ба 13 апрели соли равон дар минтақаи Кӯлоби вилояти Хатлон борони сел ва жола борида, дар натиҷа дар деҳаи Одинабойи ҷамоати деҳоти Саричашмаи ноҳияи Шӯробод қисми теппа лағжида, деҳаи мазкурро пахш намуд, ки дар натиҷа як қисми хонаҳои истиқоматӣ зери лой монда, хароб гардиданд ва аз рӯи маълумотҳои пешакӣ талафоти  ҷонӣ низ ҷой дорад.
Бар асари ҳодисаи мазкур хоҷагии қишлоқ зарар дида, талафоти ҳайвоноти шохдори хонагӣ низ ба амал омадааст.
Инчунин хоҷагии кишоварзӣ дар деҳаҳои Панҷосиёб, Ғарабдара ва Лойлуқаи ҷамоати деҳоти Зарбдори шаҳри Кӯлоб низ аз боришоти сел зарар дид.
Бо супоришу дастури Президенти Ҷумҳурии Тоҷикистон Эмомалӣ Раҳмон гурӯҳи кории ҳукуматӣ бо роҳбарии муовини сарвазир Муродалӣ Алимардон дар ҳайати вазирони корҳои дохилӣ, тандурустӣ ва ҳифзи иҷтимоии аҳолӣ, нақлиёт ва раиси Кумитаи ҳолатҳои фавқулода ва мудофиаи шаҳрвандӣ таъсис дода шуда, гурӯҳи мазкур аз тариқи чархбол барои сари вақт чораҷӯӣ намудан ва ба зарардидигон кӯмак расонидан ба ҷойҳои ҳодиса сафар намуд. Кумитаи ҳолатҳои фавқулода ва мудофиаи шаҳрвандии Тоҷикистон  ба оилаҳои зарардида 60 хайма, 30 тонна сӯзишворӣ ва барои 3 хонаводаи зарардида маводи хӯрокӣ фиристод.