Талош барои низоми ягонаи барқӣ
Хоруғ, 2.04.2014. (АМИТ «Ховар», Файз Мирасан).- Ширкати барқии «Помирэнерҷӣ» тарҳи наверо рӯи даст гирифтааст, ки бар асоси он шабакаи барқи ноҳияи Ишкошим ба шабакаи ягонаи барқи вилоят пайваст шуда, неругоҳи мазкур бо таҷҳизоти нав таъмин мегардад.
Дар ҳоли ҳозир манбаи асосии таъмини муштариёни қаламрави ноҳияи Ишкошим бо неруи барқ аз ҳисоби фаъолияти неругоҳи барқи обии «Помир-1» ва неругоҳи «Хоруғ» ба роҳ монда шудааст.
Ба ин далел тибқи тасмими ширкати барқии «Помирэнерҷӣ» қарор аст, ки дар охири семоҳаи дуюми соли 2014-ум неругоҳи барқии «Наматгут» ба шабакаи ягонаи барқии «Помирэнерҷӣ» пайваст хоҳад шуд.
Дар айни ҳол барои таъмиру навсозии неругоҳи «Наматгут» таҷҳизоти муосири техникӣ аз Ҷумҳурии мардумии Чин ворид шудааст. Дар пайи тавофуқоти ширкати барқии «Помирэнерҷӣ» ва ширкати «Худро-Ту»-и Чин тасмим гирифта шуд, ки ин таҷҳизот аз сӯи мутахассисони чинӣ насб хоҳад шуд ва неругоҳи «Наматгут»-и ноҳияи Ишкошим ба шабакаи ягонаи барқи вилоят пайваст мешавад. Бо пайваст шудани ин неругоҳ ба шабакаи ягона мушкилоти таъмини барқ дар водии Вахон низ аз миён бардошта хоҳад шуд.