Ташкили гурӯҳҳои ташаббускори занон

Кӯлоб, 26.04.2014. (АМИТ «Ховар», Сулаймони Хол).- Дар доираи сафари корӣ ба вилояти Хатлон  раиси Кумитаи кор бо занон ва оилаи назди Ҳукумати ҶТ Махфират Хидирова   дар шаҳри Кӯлоб бо доираи васеи занону бонувони фаъол  мулоқот намуда, оид ба баланд бардоштани мавқеи зан дар ҷомеа, раванди ба вазифаҳои  роҳбарӣ таъйин намудани занони болаёқат, сохибтахассус ва таҷрибадор, дастовардҳои занону духтарони соҳибкор, эҳёи ҳунарҳои миллӣ сухан гуфта, саҳми зани тоҷикро дар раванди дигаргунсозии ҷомеаи шаҳрвандии Тоҷикистон бориз арзёбӣ намуд.  
Дар вохӯрӣ ҳамчунин оид ба ҷой доштани зуҳуроти гуногуни номатлуб дар байни занону духтарон, аз қабили худсӯзию худкушӣ, ҷудошавии оилаҳои ҷавон ва гаравидани ҷавонон ба ҳизбу ҳаракатҳои ифродгаро, содир намудани чиноятҳои дуздӣ, нашъамандию гирифторӣ ба бемориҳои гуногуни сироятӣ андешарониҳо сурат гирифтанд. 
  Зикр шуд, ки барои дар оянда таҳким бахшидан ба фаъолияти  бахшҳои кор бо занон ва оила  зарур аст, ки аз ҷониби фаъолзанон гурӯҳҳои ташаббускор ташкил шаванд.