Ваҳдат дорои имкониятҳои фаровони сайёҳист
Душанбе, 19.04.2014. (АМИТ «Ховар», Мавҷуда Анварӣ). — Шаҳри Ваҳдат дорои имкониятҳои фаровони сайёҳӣ буда, мавқеи ҷойгиршавию табиати зебо ва наздик будани он ба пойтахти мамлакат имкон медиҳад, ки бо ҷалби соҳибкорони ватанӣ ва сармояи мустақим соҳаи сайёҳӣ дар ин мавзеъ боз ҳам тараққӣ дода шавад.
Бахусус минтақаи Ромит, истироҳатгоҳҳои Явроз ва Донишу Кайҳон ва дигар мавзеъҳои сайёҳии шаҳр бояд бо инфрасохтори муосир ва шароити мусоиди истироҳату саёҳат таъмин шаванд.
Сарвари Давлат Эмомалӣ Раҳмон зимни сафари кориаш ба шаҳри Ваҳдат, ки 15-апрели соли ҷорӣ сурат гирифт, ба кумитаҳои телевизион ва радио, ҷавонон, варзиш ва сайёҳӣ ва мақомоти иҷроияи ҳокимияти давлатии шаҳри Ваҳдат супориш дод, ки ҷиҳати тарғиби ҳамаҷонибаи мавзеъҳои сайёҳии ҳудуди шаҳр ва бунёди иншооту инфрасохтори муосир тадбирҳои зарурӣ андешанд.