Вохӯриҳои С. Аслов дар Арабистони Саудӣ

Душанбе, 1.04.2014 (АМИТ «Ховар»).- Дар чаҳорчӯби сафари расмӣ ба Подшоҳии Арабистони Саудӣ вазири корҳои хориҷии Ҷумҳурии Тоҷикистон Сироҷидин Аслов 31 марти 2014 дар Риёз  бо вазири иқтисод ва барномарезии Арабистони Саудӣ Муҳаммад ал-Ҷосир мулоқот намуд.
Дар мулоқот масъалаҳои ҳамкорӣ байни ду кишвар дар соҳаҳои тиҷорат, сармоягузорӣ, энергетика, кишоварзӣ ва ғайра мавриди баррасӣ қарор гирифтанд. 
Ҷонибҳо изҳор намуданд, ки бахши хусусӣ дар густариши ҳамкории иқтисодии дуҷониба нақши калидӣ хоҳад дошт.
Инчунин, 31 марти соли 2014 дар Риёз вазири корҳои хориҷии Ҷумҳурии Тоҷикистон Сироҷидин Аслов бо раиси Шӯрои палатаҳои Подшоҳии Арабистони Саудӣ Абдуллоҳ ибни Саид ал-Мабтӣ дидор намуд.
Дар мулоқоти мазкур зарурати барқарор намудани ҳамкорӣ байни Палатаи савдо ва саноати Ҷумҳурии Тоҷикистон ва Шӯрои палатаҳои Арабистони Саудӣ таъкид гардид. 
Мусоҳибон изҳор намуданд, ки имконоту зарфиятҳои фаровон барои густариши ҳамкорӣ байни ду кишвар дар соҳаҳои гуногун, ба вижа бахши хусусӣ вуҷуд доранд.