Вуруди маҳсулоти пластикӣ аз Чехия

 
Душанбе, 3.04.2014. (АМИТ «Ховар», Лайло Тоирӣ).-  Вазири рушди иқтисод ва савдо Шариф Раҳимзода дар вохӯрии худ  бо Сафири Ҷумҳурии Чехия дар Ҷумҳурии Тоҷикистон  Гинэк Пейха, ки 2 апрели соли равон  дар Вазорати рушди иқтисод ва савдо баргузор гардид, заминаи хуби ҳамкорӣ дар байни ду кишварро махсусан таъкид намуд.
Тавре ки дар ҷараёни вохӯрӣ зикр гардид, гардиши савдои хориҷӣ байни ду кишвар соли гузашта тибқи маълумоти расмии оморӣ 3 миллиону 428,5 ҳазор  доллари ИМА-ро ташкил дод. Аз Ҷумҳурии Тоҷикистон бештар матои пахтагин ва нахи пахта содир шуда, аз Ҷумҳурии Чехия ба Тоҷикистон дастгоҳу таҷҳизоти гуногун ва маҳсулоти пластикӣ ворид гардидаанд.
Мусоҳибон рушди ҳамкориҳои иқтисодию тиҷоратиро дар соҳаҳои мошинсозӣ, саноати хӯрокворӣ, саноати сабук, гидроэнергетика, тандурустӣ, сайёҳӣ, пешниҳоди хизматрасониҳои молиявӣ ва бонкӣ, бозомӯзии мутахассисон, ташкили намоишгоҳҳо ва бизнес-форумҳо афзалиятнок ҳисобида, омодагии кишварашонро барои вусъати ҳамкориҳои мутақобилан судманд баён доштанд.