Як мактаб барои ду ноҳия

Айнӣ, 19.04.2014. (АМИТ «Ховар», Гулбаҳори Худойбердӣ).- Бо Қарори Ҳукумати Ҷумҳурии Тоҷикистон мақомоти иҷроияи маҳаллии ҳокимияти давлатии ноҳияи Кўҳистони Мастчоҳ ба 120 оилаи ниёзманди деҳаи Оббурдон аз заминҳои шафати деҳаи Шамтучи ноҳияи Айнӣ барои хонаи истироҳатӣ замин ҷудо кард. Феълан аксари сокинон дар манзилҳои навсохти худ зиндагӣ доранд. Деҳаи нав ҳанўз ном надорад, вале сокинон мехоҳанд онро «Ҷавонӣ» ном гузоранд. Кўдакони ин макони  нав барои ба мактаби маркази деҳаи Оббурдон рафтан душворӣ мекашанд, зеро роҳ дур аст. Аз ин рў онҳо дар мактаби деҳаи Шамтучи ноҳияи Айнӣ , ки соли 2012 бунёд ёфта, дорои 6 синфхона, ҳуҷраи маъмурӣ, хонаи муаллимон мебошад, ба таҳсил машғуланд. Мардуми деҳаҳои ҳамсояи Оббурдони ноҳияи Кўҳистони Мастчоҳ ва Шамтучи ноҳияи Айнӣ бо ҳам зиндагии аҳлона доранд.
    Мактаб ҳамчун филиали мактаби таҳсилоти миёнаи умумии рақами 17-и  ба номи Сиддиқ Зарифови деҳаи Шамтуч амал мекунад Бино ба гуфти мудир Акбар Муҳаммадиев дар филиал 30 нафар хонанда таҳсил дорад.