Ёде аз шоири оламшумули Шарқ

Хоруғ, 23.04.2014. (АМИТ «Ховар», Файз Мирасан).- Омӯзгорон ва толибилмони мактаби президентии шаҳри Хоруғ бо баргузории маҳфили хотирмон аз 600-солагии  шоир ва мутафаккири  тоҷик Нуриддин Абдураҳмони Ҷомӣ истиқбол гирифтанд 
         Ин маҳфил  бо ташаббуси  маъмурияти китобхонаи мактаб роҳандозӣ шуд. Дар баробари  қироати  порчаҳои шеърӣ аз эҷодиёти Ҷомӣ, ҳамчунин дар иҷрои хонандагони  синфҳои болоӣ аз рӯзгори ин мутафаккири асри 15  саҳнаҳо намоиш дода шуданд.   Ҳамчунин  гуфта шуд, ки Нуриддин  Абдураҳмони Ҷомӣ  7-уми ноябри соли 1414 дар деҳаи Харҷурди  вилояти Ҷом  таваллуд шуда, аз синни хурдсолӣ ба навиштани шеър шурӯъ намуда,  дар муддати начандон тӯлонӣ дар байни мардуми Шарқ шӯҳратёр мешавад.  Шоир дар ҳавзаи адабӣ бо асарҳояш   «Баҳористон», «Ҳафт авранг», «Чиҳил ҳадис»  шӯҳрати оламшумулро касб кардааст. Абдураҳмони Ҷомӣ  соли 1492 дар шаҳри Ҳироти  Ҷумҳурии Исломии Афғонистон аз олам  даргузаштааст.
 Ёдовар мешавем, ки 600-умин солгарди зодрӯзи Абдураҳмони Ҷомӣ бо пешниҳоди  Президенти кишвар имсол дар саросари мамлакат таҷлил мешавад.