Ҳамоиши ҷавонон дар Бохтар

Бохтар, 22.05.2014(АМИТ «Ховар», Меҳрубон Сатторӣ).- Дирӯз, 21 майи соли ҷорӣ дар ноҳияи Бохтари вилояти Хатлон бахшида ба Рӯзи ҷавонон ҳамоиши ҷавонон доир шуд. Зиёда аз 100 ҷавон аз шаҳри Қӯрғонтеппа аз тариқи роҳпаймоӣ вориди ноҳия гардида, дар чорабинии ҷашнии ҷавонони бохтарӣ ширкат карданд. 
Тавре ки мудири бахши ҷавонон, варзиш ва сайёҳии ноҳия Мунаввара Сатторова  иброз дошт, бахшида ба ҳафтаи ҷавонон дар байни  ҷавондухтарон озмуни  «Бонуи чилкокули хатлонӣ»  ва дигар чорабиниҳо гузаронида шуданд. Зимнан бояд зикр кард, ки дар ноҳияи Бохтар зиёда аз 78 ҳазор нафар ҷавон кору зиндагӣ мекунад. Аз ин шумора  84 нафар дар қайди шуғли аҳолӣ буда, 26 нафар дар мақомоти роҳбарикунанда фаъолият дошта, 3500 нафар дар муҳоҷират меҳнатӣ ва 95 нафар ҷавон маъюби гурӯҳи 3 мебошад.    Дар мусобиқаҳои варзишии байналмилалӣ ва ҷумҳуриявӣ дар  соли ҷорӣ ҷавонони бохтарӣ 5 медали тилло, 4 нуқра ва 14 медали биринҷӣ ба даст оварданд,-афзуд мудири бахш Мунаввара Сатторова.
Дар назар аст, ки пагоҳ, 23 май дар боғи фарҳангию фароғатии шаҳри Қурғонтеппа  вохӯрии  зиёда аз 1100 нафар ҷавони вилоят бо раиси вилояти Хатлон  Давлатшо Гулмаҳмадов баргузор шавад.