Ҳамоиши доираҳои тиҷоратии Тоҷикистону Лаҳистон

    Душанбе, 29..05.2014.(АМИТ «Ховар», Марзия Саидзода).-Дар доираи ҷаласаи IV -уми Комиссияи байниҳукуматии Тоҷикистону Лаҳистон, ки интизор аст 6 июн дар Душанбе доир гардад, 5 июн ҳамоиши доираҳои тиҷоратии ҳар ду кишвар баргузор мешавад. 
   Аз Палатаи савдо ва саноати Тоҷикистон ба АМИТ «Ховар» иттилоъ доданд, ки дар робита ҷиҳати иштирок дар ин чорабиниҳои иқтисодӣ ҳайати бонуфузи доираҳои тиҷоратии Лаҳистон аввалҳои моҳи июн озими Душанбе мегарданд. 
       Интизор меравад, ки дар ҳамоиши доираҳои тиҷоратии Тоҷикистону Лаҳистон  роҳбарону намояндагони ширкату корхонаҳои истеҳсолии Лаҳистон, ки дар бахшҳои энергетика, мошинсозӣ, кишоварзӣ, сохтмон, дорусозӣ ва соири соҳаҳо фаъолият доранд, иштирок намуда, бо ҳамтоёни тоҷики худ мулоқот карда, созишномаҳои ҳамкорӣ ба имзо хоҳанд расонд.
       Дар назар аст, ки ҳайати соҳибкорону тоҷирони лаҳистонӣ аз намоишгоҳи байналмилалии «ИнтерЛегпром» боздид намоянд.