Ҳамоиши Муколамаи ҳамкории кишварҳои Осиё

Душанбе, 29.05.2014. (АМИТ «Ховар»). — 28  май  дар  шаҳри Ланчжоуи  музофоти  Гансуи Ҷумҳурии Мардумии  Чин  бахшида  ба эҳёи  Роҳи  бузурги  абрешим  ҳамоиши  Муколамаи  кишварҳои Осиё  баргузор гардид. 
Тавре  ки  аз  ВКХ  ҶТ   хабар доданд,  роҳбари  ҳайати  Тоҷикистон,  муовини  вазири  корҳои  хориҷӣ  Низомиддин  Зоҳидов   зимни   суханрониаш   зикр  намуд, ки анъанот ва  фалсафаи Роҳи  бостонии  абрешим   дар ҷаҳони  имрӯза  аҳамияти  бештаре   пайдо  мекунад. Дар  ҷаҳони  имрӯза,  сарфи  назар  аз  дастовардҳои  беназири  хиради  башарият, ҳанӯз  ҳам ихтилофоту  муҳорибаҳо, носуботии  иқтисодӣ  ва  бӯҳронҳои  молиявӣ  ба назар  расида, монеаҳои  сари роҳи  тиҷорат ва  мубодилаи  фарҳанг  мушоҳида  мегардад.
Иштирокдорони  ҳамоиш  мақоми  муколама дар эҳёи Роҳи абрешимро мавриди  муҳокима  қарор  доданд. Дар  робита бо  ин  ташкили  шабакаи нақлиётию коммуникатсионии  пайвасткунандаи  кишварҳои  қад — қади  Роҳи  абрешим, ташаккули ҳамкории  кишварҳои  аъзои  созмони  мазкур  дар  бахши  энергетика, таҳкими  ҳамкорӣ  ба  манзури ҳифзи  муҳити  зист  ва  ташкили  Роҳи  абрешими «сабз»,  мусоидат ба  муколамаи  фарҳангҳо  дар  фазои ташкилоти  мазкур  тавассути  сафари  ҳайатҳо  ба  кишварҳои  якдигар  ва  рушди  сайёҳӣ ба  ҳайси  вазифаҳои  аввалиндараҷае, ки  боиси эҳёи Роҳи  абрешим мегарданд,  номбар  шуданд.
Тасмим  гирифта  шуд, ки  ҳамкории  кишварҳои  аъзои  муколама  оид ба  ҳамкории  кишварҳои  Осиё аз рӯи  самтҳои  зикршудаи  ҳамкорӣ   давом дода шавад.