Ҷинояткор ба маҳбас кашида шуд

Душанбе, 7.06.2014. (АМИТ «Ховар», Муқаддас Темурзода). — 26 апрели соли ҷорӣ, тахминан соати 09:00-дақиқа дар канори роҳи мошингарди Чорбоғ-Чағатайи ноҳияи Варзоб, дар даромадгоҳи деҳаи Чағатайи ҳамин ноҳия ҷасади шаҳрванд Раҳмонов Сорбон Саидмухторович, соли таваллудаш 1986, сокини ҷамоати Чорбоғ бо аломатҳои марги маҷбурии захмҳои халандаю буранда дарёфт шуд.
Тавре ки маркази матбуоти ВКД хабар медиҳад, ҳангоми гузаронидани чорабиниҳои фаврӣ-ҷустуҷӯӣ муайян шуд, ки шаҳрванд Каримов Раҷаббек Абдуҳанонович, соли таваллудаш 1993, соҳибкор, истиқоматкунандаи деҳаи Чағатайи ноҳияи Варзоб бо шаҳрванд Сорбон Раҳмонов бо сабабе, ки Р.Каримов бо мошинаш оби лойро ба бадани С. Раҳмонов пош додааст,  муноқиша кардааст. Раҷаббек Каримов бо корди дар дасташ буда ба бадани Сорбон Раҳмонов якчанд маротиба задааст, ки дар натиҷа охирин ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Оид ба ҳодисаи мазкур аз ҷониби кормандони мақомоти корҳои дохилӣ Каримов Раҷаббек Абдуҳанонович ҳамчун гумонбар дар ҷинояти куштор дастгир гардида, ба ҳабси пешакӣ гирифта шуд.  Алҳол нисбат ба номбурда мутобиқи моддаи 104 қисми 1 Кодекси ҷиноятии Ҷумҳурии Тоҷикистон парвандаи ҷиноӣ оғоз гардида, тафтиш идома дорад.