Анҷумани омӯзгорони забони олмонӣ дар Донишгоҳи омӯзгорӣ

Душанбе, 17.05.2014. (АМИТ «Ховар», Раъно Нусратуллозода).-Дирӯз дар Донишгоҳи давлатии омӯзгории Тоҷикистон ба номи Садриддин Айнӣ Анҷумани 9-уми омӯзгорони забони олмонӣ баргузор гардид, ки дар он Сафири Ҷумҳурии Федеративии Олмон дар Тоҷикистон Холгер Греен ширкат намуд. Тибқи иттилои котиби матбуоти донишгоҳ Бахтиёри Абдураҳим, қабл аз оғози ҳамоиш сафирро ректори донишгоҳ Абдуҷаббор Раҳмонов ба ҳузур пазируфта, перомуни равобити ҳамкорӣ ва густариши он суҳбат орост. Ӯ, аз ҷумла, изҳор дошт, ки бо дастгирии Сафорати Олмон ба ҳукми анъана даромада, ки ҳамасола Анҷумани омӯзгорони забони олмонӣ бо шаҳомати хосса таҷлил гардад. Дар донишгоҳи мо махсус факултае вуҷуд дорад, ки ба донишҷӯён забони олмониро меомӯзонад. Боиси фараҳмандист, ки хоҳишмандони омӯзиши ин забон ниҳоят зиёданд.Зимни мулоқот сафир Холгер Греен барои истиқболи гарму самимӣ изҳори миннатдорӣ намуда, таъкид дошт, ки ин нахустин боздиди ӯ аз Донишгоҳи омӯзгорӣ аст ва итминони комил дорад, ки ниҳоӣ нахоҳад буд.Сипас, қисми ифтитоҳии Анҷумани 9-уми омӯзгорони забони олмонӣ бо ҳузури беш аз 150 муаллими забони олмонӣ аз макотиби олӣ ва миёнаи мамлакат ба кори худ шуруъ намуд. Мавриди зикр аст, ки дар ҳамоиш, ҳамчунин, директори идораи ҳамкориҳои Швейтсария Петер Микула, роҳбари бахши забон дар Институти ба номи Ҳёте (Тошканд) Фредерике Мёшел, роҳбари Маркази иттилоотии хадамоти DAAD Артур Рапп, профессори Донишгоҳи Дуисбург-Эссен Рупрехт Баур, намояндаи Вазорати Федералии Австрия доир ба маориф ва зан Клеменс Тонзерн ва меҳмонони дигар аз хориҷи кишвар шикар варзиданд.