Баррасии роҳҳои ҷалби сармоя баҳри истеҳсоли металон

Душанбе, 29.04.2014. (АМИТ «Ховар», Бекназари Абӯбакр). — Бо ибтикори Кумитаи давлатии сармоягузорӣ ва идораи амволи давлатии Ҷумҳурии Тоҷикистон 28 майи соли равон дар Душанбе мизи мудаввар дар мавзӯи “Метанол — сўзишвории алтернативии экологӣ ва роҳҳои ҷалби сармоя баҳри истеҳсоли ин сӯзишворӣ” бо иштироки Мудири департаменти робитаҳо бо сохторҳои давлатӣ ва ташкилотҳои ҷамъиятии Пажӯҳишгоҳи метаноли давлати Сингапур Доминик Лавин ва намояндагони мақомоти дахлдори Ҷумҳурии Тоҷикистон баргузор гардид. Дар чорабинӣ масъалаҳои истеҳсоли металон ҳамчун сӯзишворӣ аз ангишт, газ, партовҳои сахти маишӣ баррасӣ гардиданд.
Бо назардошти он ки Ҷумҳурии Тоҷикистон дорои захираи калони ангишт аст, суҳбат бештар дар доираи чӣ тавр аз ангишт коркард ва истеҳсол намудани металон сурат гирифт. Таҷрибаи мамлакатҳои пешрафтае, ки метанолро ҳамчун сӯзишворӣ истифода мебаранд, аз ҷумла ИМА, Чин ва Қазоқистон мавриди муҳокима қарор гирифт. Бо истифода аз метанол нархи маҳсулоти анъанавии сўзишворӣ, аз ҷумла бензин дар ҷумҳурӣ то андозае коҳиш хоҳад ёфт.
Дар фарҷоми ҷамъомад иштирокдорон изҳори қаноатмандӣ намуда, барои истеҳсоли металон дар ҷумҳурӣ бо ҷалби сармоягузории хориҷӣ ибрози ақида намуданд. Кумита дар навбати худ минбаъд барои ҷалби сармоя ҷиҳати истеҳсоли сӯзишвории метанол аз ангишт ҳамкориҳоро бо ташкилотҳои ҳавасманд ҷоннок хоҳад кард.